Қазақтың «секс символы» кім?

Әлемнің ең қалаулы әйелдері (еркектері де) кім екенін білесіз. Джоли, Фокс, Йохансон десе, еркек атаулының сілекейі шұбыра жөнеледі екен-мыс (қайдан білейік). Біз де қарап қалғамыз жоқ. Былтыр «нұр.кз» порталы ең сұлу, ең сүйкімді, ең тартымды, ең қылықты… емес, ең «сексуальный» отандық «жұлдызды» түгендеп берді.

Содан не керек, біреулер мәшһүр актриса деп жүрген Әсел Сағатова «алтын алқа» тағынды. Белгілі фильмде орыстың баласын шөпке жатқызып  сүйіп алатын Ассэл «сайлаушылардың» 32,2 пайызының даусын жинапты (кәдімгідей оза шапты деген сөз).

Әселдің артынан барын киіп (дәлірегі шешіп), бақанын сүйретіп  Линда Нигматуллина шауып жеткен. «Медвежья охотада» (Буржуй ойнайтын орыс киносы ше) жалаңаш түсіп, атышулы «Қайрат-чемпионда» ұл сияқты қызды жетектеп, соған «әйелге шыққысы келетін» Линда Талғатқызы дауыстың 14 % қалтасына салған.

«Сталинге сыйлық», «Рывок» фильмдерінде төбе көрсетіп, өзін киноактриса сезініп жүрген үрлеулі әнші Әсел Сәдуақасова «қола медальді» місе тұтса керек (9,5 пайыз).

Одан төменірек 7 пайызбен Лидо, және 5,8 пайызбен Мақпал Исабекова тұрақтаған екен. Ал Ділназ Ахмадиева, Динара Сұлтан секілді әншілер мен «интим-кеңестермен» бөлісуден жалықпайтын Юлия Зайцеваның 5 пайыздан аз дауыс жинап, қалаулылар қатарына енбей қалғаны ұят болыпты.  Үтікті қоссаң да жарқ етіп шыға келетін Мәдина Сәдуақасова бұл аламаннан бейхабар қалса керек, кейін санын соғып өкініпті деп естідік (әрине, қалжың) :).

Ал «всепрокино» деген сайт «секси» жігіттерді іздепті. Киноэкраннан «жөнді» жігіт таба алмаған автор айналып келіп Санжар Мәдиевке тоқтаған. Жай ғана тоқтамаған, актерден жартылай жалаңаш сурет талап еткен. Расында, «Айдың арғы беті» мен «Қызғылт қоян» кейіпкерінің келбетінде мін жоқ (Санжар, бірақ жалаңаштанып суретке түсіп жүрмеңіз :)).

Басқа біреулер Берік Айтжанов («Ликвидатор» Арсен, «Ағайынды» Шыңғыс, Мұстафа Шоқайдың інісі Байдрахман және «Махамбет») пен Мұрат Бисембинді («Рэкетир» Руслан брат) атайтынын «аталарым айтып» отыр. «Намба уан»романтик әншіміз Мейрамбек Беспаевты ұмытып кетсек, тыңдарман кешіре қоймас. Бір кезде Қоянбаевтың да осы тақылеттес рейтингті бастап тұрғаны еміс-еміс есімде (өзім бірақ ол жерге қол қойған жоқпын). Егер тереңдеп қарасақ, қазақтың «на все времена» ең көрікті жігіттері Сәкен Сейфуллин мен оның қыз жүрегі жолындағы бас «сапернигі» Мағжан Жұмабаев шығар. Маған салса, әр жылдардағы қазақтың «секс-символдарының» тізімін жасар едім, бірақ ел түтіп жеп қоя ма деп қорқып жүрмін 🙂 Алдымен мынаны біліп алу керек: «секс-символ» деген «атақ» қазаққа керек пе? (Айжаннұрдың «секси деген сөзді айтудан ұялмайтын болдық» дегені есіме түсіп, қызарып-ақ отырмын :)).  Егер керек деп тапсаңыз, қазіргілерден «сысимвол» кім екенін жазып қалдырыңыз))

СС. ( бұл жолы «сөз соңы» дегенім) Сағатованың «жетістігін» жариялап, көгеріп кеткен ақпаратпен бөлісу емес еді ниет. Сіздің пікірді білгім келіп «өліп» барам ;).